រាជធានីភ្នំពេញ៖ នៅថ្ងៃទី១៧ ខែមេសានេះ គណៈកម្មាធិការជាតិរៀបចំការបោះឆ្នោត (គ.ជ.ប) បានជូនដំណឹងអំពីការចូលរួមសង្កេតការណ៍ក្នុងការបោះឆ្នោតជ្រើសតាំងតំណាងរាស្រ្តនៃប្រទេសម៉ាល់ឌីវ ក្នុងនាមជាអ្នកសង្កេតការណ៍បោះឆ្នោតអន្តរជាតិ តបតាមការអញ្ជើញរបស់គណៈកម្មាធិការជាតិរៀបចំការបោះឆ្នោតនៃសាធារណរដ្ឋម៉ាល់ឌីវ។ គួរបញ្ជាក់ថា ស្ថាប័នជាតិរៀបចំការបោះឆ្នោតរបស់កម្ពុជា គ.ជ.ប ព្រមជាមួយស្ថាប័នរៀបចំការបោះឆ្នោតនៃប្រទេសជាច្រើនទៀត ត្រូវបានទទួលការអញ្ជើញឱ្យចូលរួមជាអ្នកសង្កេតការណ៍បោះឆ្នោតជ្រើសតាំងតំណាងរាស្រ្តនៃប្រទេសម៉ាល់ឌីវ ដែលនឹងធ្វើឡើងនាថ្ងៃទី២១ ខែមេសា ឆ្នាំ២០២៤ ខាងមុខនេះ។ 

ឆ្លើយតបទៅនឹងការអញ្ជើញនេះ លោក ប្រាជ្ញ ច័ន្ទ ប្រធានគណៈកម្មាធិការជាតិរៀបចំការបោះឆ្នោតនៃព្រះរាជាណាចក្រកម្ពុជា បានចាត់តាំងប្រតិភូកម្ពុជាចំនួន ២ រូបឱ្យចូលរួមក្នុងនាមជាអ្នកសង្កេតការណ៍បោះឆ្នោតអន្តរជាតិ។ ក្នុងនោះប្រតិភូ គ.ជ.ប កម្ពុជារួមមាន លោក ឌឹម សុវណ្ណារុំ សមាជិក និងជាប្រធានក្រុមប្រតិកម្មព័ត៌៌មាននៃគណៈកម្មាធិការជាតិរៀបចំការបោះឆ្នោត និងលោក ស៊ិន សាវតា ប្រធាននាយកដ្ឋានគ្រប់គ្រងទិន្នន័យអ្នកបោះឆ្នោត និងបញ្ជីបោះឆ្នោត ដែលនឹងចេញដំណើរឆ្ពោះទៅកាន់ប្រទេសម៉ាល់ឌីវ នាថ្ងៃទី១៩ ខែមេសាខាងមុខ។

គួរបញ្ជាក់ថា កន្លងមកគណៈកម្មាធិការជាតិរៀបចំការបោះឆ្នោតនៃសាធារណរដ្ឋម៉ាល់ឌីវ ក៏ធ្លាប់បានបញ្ជូនអ្នកសង្កេតការណ៍បោះឆ្នោតរបស់ខ្លួន មកចូលរួមសង្កេតមើលការបោះឆ្នោតជ្រើសតាំងតំណាងរាស្រ្តនៅកម្ពុជា កាលពីឆ្នាំ២០១៨ ផងដែរ៕